Höfundur: Sóley Ágústa Ómarsdóttir

Leiðbeinandi: Lóa Guðrún Gísladóttir

Ágrip/Efni:

Móðurhlutverkið er stórt og veigamikið hlutverk sem er í senn fallegt og gefandi en jafnframt ábyrgðarmikið og krefjandi. Hlutverkið sjálft sem og sýn og væntingar til þess hefur breyst í aldanna rás og bilið á milli kynjahlutverkanna minnkað. Þrátt fyrir það eru konur enn í dag þær sem bera megin ábyrgð á umönnun og velferð barna sinna auk þess að sjá um heimilið. Í nútímasamfélagi eru kröfur til mæðra miklar og nánast ógjörningur fyrir fullfríska móður að standa undir þeim væntingum sem samfélagið setur. Það gefur því auga leið að ef viðbótaráskoranir blandast inn í jöfnuna verður róðurinn enn þyngri, og það þekkja mæður með ADHD af eigin raun. Megin markmið rannsóknarinnar er að varpa ljósi á upplifun mæðra með ADHD af móðurhlutverkinu auk þess að skoða hvernig hugmyndir samfélagsins um mæður hafa litað andlega heilsu þeirra og sjálfsmynd. Rannsóknin er af eigindlegum toga og byggði gagnasöfnun á hálf-opnum einstaklingsviðtölum við átta mæður með ADHD greiningu á aldursbilinu 31-43 ára, viðtölin voru þemagreind.

Helstu niðurstöður leiddu í ljós að mæður með ADHD upplifi sig oft öðruvísi og eigi, sökum einkenna sinna, oft í erfiðleikum með ýmsa þætti móðurhlutverksins sem samfélagið gerir ráð fyrir að þær ráði auðveldlega við. Þá sýndu niðurstöðurnar að mæðurnar skorti stuðning og rífi sig niður fyrir að ná ekki að standast væntingar samfélagsins og lifi því oft við neikvæða sjálfsmynd, lágt sjálfsmat og skerta andlega heilsu. Niðurstöður sýndu þó einnig að greiningarferlið, ADHD lyf og aukinn þroski hafi oftar en ekki haft jákvæð áhrif á líðan þeirra og sjálfsmynd þar sem það stuðlaði að aukinni, sjálfsþekkingu, sjálfskilningi og mildi í eigin garð. Niðurstöður rannsóknarinnar eru mikilvægar fyrir þær sakir að þær varpa ljósi á upplifun hóps í samfélaginu sem ekki hefur áður verið rannsakaður, auk þess sem niðurstöðurnar geta nýst til frekari rannsókna á viðfangsefninu.