Nafn nemanda: Jenný Marín Kjartansdóttir
Námsleið: Menntunarfræði leikskóla, M.Ed.
Leiðbeinandi: Renata Emilsson Pesková
Meðleiðbeinandi: Karen Rut Gísladóttir

Ágrip: Rannsókn þessi fjallar um samskipti fjöltyngdra barna í leik og skipulögðu starfi í leikskóla. Félagsleg þátttaka getur reynst fjöltyngdum börnum áskorun á meðan þau eru enn að þróa færni sína í íslensku, sér í lagi þegar leikur og skipulagt starf í leikskólum á Íslandi byggir á notkun tungumálsins (Eyrún María Rúnarsdóttir og Svava Rán Valgeirsdóttir, 2019). Með þátttöku í leik og samskiptum við aðra fá börn tækifæri til að tengjast öðrum börnum vináttuböndum ásamt því að þau upplifa sig frekar tilheyra barnahópnum (Anna Magnea Hreinsdóttir og Hanna Ragnarsdóttir, 2019). Mikilvægt er að starfsfólk leikskóla sé meðvitað um að styðja við leik barna því þar gefast tækifæri til að vinna með málþroska og félagsleg samskipti (Hanna Ragnarsdóttir og Fríða B. Jónsdóttir, 2016). Rannsóknarspurningin sem leitað var svara við var: Hvernig get ég sem leikskólakennari betur stutt við samskipti fjöltyngdra leikskólabarna?
Stuðst var við aðferðafræði starfendarannsókna og gögnum safnað með þátttökuathugunum, rannsóknardagbók, uppeldisfræðilegum skráningum og ljósmyndum. Niðurstöður sýna fram á skýra þróun starfshátta, frá skipulögðum og kennarastýrðum málörvunarstundum yfir í stýrðan hlutverkaleik og að lokum markvissan stuðning við sjálfsprottinn leik. Þótt skipulagðar stundir hafi veitt mér og börnunum öryggi í upphafi, takmörkuðu þær samskipti barnanna á milli. Með því að draga úr stýringu og gerast virkur þátttakandi í sjálfsprottnum leik skapaðist meira rými fyrir merkingarbæra málnotkun og myndun vináttutengsla á forsendum barnanna sjálfra. Lærdómur rannsóknarinnar er að nálægð leikskólakennara er forsenda þess að styðja við samskipti ásamt því að skapa fjöltyngdum börnum tækifæri til að nota og efla tungumálaforða sinn í gegnum leik. Í ljósi þess að leikur er meginnámsleið barna er brýnt að starfsfólk leikskóla hafi þekkingu á leik til þess að geta stigið þar inn og nýtt námstækifærin sem þar gefast. Jafnframt sýnir rannsóknin hvernig starfendarannsóknir nýtast sem valdeflandi leið til fagþróunar og markvissra umbóta í fjölmenningarlegu leikskóla