Nafn nemanda: Tara Sif Þrastardóttir
Námsleið: Uppeldis- og menntunarfræði (Áhættuhegðun og velferð), MA
Leiðbeinandi: Eva Jörgensen
Sérfræðingur: Katrín Ólafsdóttir

Ágrip: Í þessari rannsókn er fjallað um reynslu grunnskólakennara af vendinámi (e. flipped learning) á unglingastigi innan íslenska menntakerfisins. Markmið rannsóknarinnar er að kanna hvernig kennarar upplifa vendinám og beita því í daglegu starfi sínu og hvaða tækifæri og áskoranir þeir tengja við kennsluaðferðina. Tilgangurinn er meðal annars að dýpka skilning á því hvernig vendinám virkar í kennslu á unglingastigi og þau áhrif sem það getur haft á kennsluhætti og hlutverk kennara. Rannsóknin er eigindleg og byggist á hálfstöðluðum viðtölum við kennara sem hafa reynslu af því að beita kennaramiðuðu námi og vendinámi á unglingastigi. Gögnin voru greind með þemagreiningu. Greiningarferlið leiddi í ljós þrjú þemu: umbreytingu kennsluhátta í átt að nemendamiðaðri kennslu, tækifæri og styrkleika vendináms og áskoranir og hindranir í vendinámi. Niðurstöður benda meðal annars til þess að flestir kennarar upplifi að vendinám geti skapað aukið svigrúm fyrir sveigjanlegri kennslu, einstaklingsaðstoð og virkari þátttöku nemenda. Kennararnir lýstu breytingum á eigin hlutverki, þar sem áherslan færðist frá beinni miðlun yfir í leiðsögn og eftirfylgni. Jafnframt kom fram að innleiðing aðferðarinnar gæti verið tímafrek og krefjandi, einkum í upphafi, og að reynslan væri að nokkru leyti misjöfn eftir nemendahópum. Í því samhengi lögðu flestir kennararnir áherslu á mikilvægi skýrs ramma, reglulegrar eftirfylgni og aðlögunar aðferðarinnar að aðstæðum hverju sinni. Að lokum benda niðurstöðurnar einnig til þess að vendinám, eins og það birtist í frásögnum kennaranna, sé ekki ein afmörkuð aðferð heldur frekar sveigjanleg kennslunálgun sem mótast oftast í samspili við skipulag skólastarfs, nemendahópa og faglegt mat kennara.