Nafn nemanda: Kristfríður Rós Stefánsdóttir
Námsleið: Íþrótta- og heilsufræði, MS
Leiðbeinandi: Vaka Rögnvaldsdóttir
Sérfræðingur: Ársæll Már Arnarson
Ágrip: Andleg heilsa og líkamleg frammistaða eru nátengd og mikilvægir þættir í þroska ungra íþróttaiðkenda. Rannsóknir sem beinast sérstaklega að stúlkum á fyrri stigum unglingsára í knattspyrnu eru þó takmarkaðar. Meginmarkmið þessarar rannsóknar var að kanna hvort líkamleg frammistaða og líkamssamsetning tengist sálfélagslegum þáttum hjá 12 ára knattspyrnuiðkendum. Grunngögn voru fengin úr SKORA rannsóknarverkefninu og náðu til 108 stúlkna (meðalaldur 11,7 ár) úr tíu knattspyrnufélögum á höfuðborgarsvæðinu. Líkamleg frammistaða var metin með 40 m spretthlaupsprófs og knattleikniprófi með bolta (IAT-B), en sálfélagslegir þættir voru metnir með stöðluðum spurningalistum sem mældu ánægju af æfingum, lífsánægju, líkamsímynd og frammistöðukvíða. Lýsandi tölfræði, einföld dreifigreining (ANOVA) og Spearman’s fylgnistuðlar voru notaðir við úrvinnslu gagna. Þátttakendur sýndu meðal ánægju af æfingum (9,0 ± 1,2), meðal lífsánægju (8,7 ± 1,2), jákvæða líkamsímynd (15,0 ± 2,2) og frammistöðukvíða (1,8 ± 0,4). Meiri ánægja tengdist hraðari tíma í spretthlaupi og í leikni með bolta (r = −0,304 og r = −0,435, p < 0,01). Ánægja af knattspyrnu var einnig meiri hjá leikmönnum í hærri hæfileikaflokkum (p < 0,001). Hærri lífsánægja og líkamsímynd tengdust marktækt meiri ánægju af knattspyrnu, en ekki hraða í spetthlaupi, knattleikni eða hæfileikaflokkun. Frammistöðukvíði tengdist hvorki frammistöðu, líkamssamsetningu né hæfileikaflokkun. Niðurstöður benda til þess að ánægja af æfingum sé helsti sálfélagslegi þátturinn sem tengist líkamlegri frammistöðu hjá stúlkum á fyrri stigum unglingsára í knattspyrnu. Víðtækari mælikvarðar á vellíðan virðast hins vegar að mestu óháðir frammistöðu á þessum aldri. Þessar niðurstöður undirstrika mikilvægi þess að skapa jákvætt og styðjandi íþróttaumhverfi sem eykur ánægju, styður við íþróttaþroska og eflir langtímaþátttöku í íþróttum.