Nafn nemanda: Hrafnhildur Magney Gunnarsdóttir
Námsleið: Íþrótta- og heilsufræði, MS
Heiti verkefnis: Hásinaslit meðal fimleikafólks á Íslandi og mögulegir áhættuþættir
Leiðbeinandi: Vaka Rögnvaldsdóttir
Sérfræðingur: Gréta Jakobsdóttir

Ágrip/efni (drög): Hásinaslitum í íslenskum fimleikum virðist hafa fjölgað á undanförnum árum og því er mikilvægt að skoða þá þætti sem hugsanlega hafa áhrif á þessi meiðsli. Markmið rannsóknarinnar var að kanna mögulega þætti sem tengdust aðdraganda og aðstæðum hásinaslita meðal fimleikaiðkenda á Íslandi. Þátttakendur voru 19 fimleikaiðkendur sem höfðu slitið hásin. Þar sem þrír þátttakendur höfðu slitið hásin oftar en einu sinni náði rannsóknin til alls 23 hásinaslita. Þátttakendur svöruðu spurningalista um aðdraganda og aðstæður hásinaslitanna ásamt opnum spurningum þar sem þeir lýstu með eigin orðum mögulegum ástæðum hásinaslitanna. Niðurstöður sýndu að öll hásinaslitin urðu í fráspyrnu í stökkum sem framkvæmd voru aftur á bak. Flest hásinaslitin urðu á dýnu/fíber (60,9%), en einnig á áhaldagólfi (26,1%) og dansgólfi í hópfimleikum (13,0%). Alls urðu 69,6% hásinaslitanna á keppnistímabili. Flestir þátttakendur voru í meistaraflokki í hópfimleikum (56,5%) eða kepptu í frjálsum æfingum í áhaldafimleikum (26,1%). Fyrir hásinaslitið höfðu 56,5% þátttakenda fundið fyrir verkjum í hásin, kálfa eða ökkla og 39,1% höfðu fundið fyrir stífni eða bólgu í kálfa eða hásin. Í persónulegum skýringum þátttakenda töldu þeir helst fyrri meiðsli eða einkenni (56,5%), ófullnægjandi tækni eða framkvæmd stökks (30,4%), mikið æfingaálag (21,7%) og endurkomu eftir æfingahlé (17,4%) vera mögulegar ástæður meiðslanna. Aðrar ástæður sem nefndar voru tengdust aðstæðum í fimleikasal, svo sem hörðu gólfi og kulda í sal, ójafnvægi í æfingaálagi og álagsdreifingu auk andlegra þátta. Þegar hásinaslitið átti sér stað voru 21,7% þátttakenda að snúa aftur til æfinga eftir hlé vegna COVID-19. Niðurstöðurnar varpa ljósi á ýmsa þætti sem voru til staðar í aðdraganda hásinaslitanna, meðal annars fyrri einkenni, tækni í framkvæmd og erfiðleikastig æfinga, æfingaálag og endurkomu eftir æfingahlé. Rannsóknin er sú fyrsta sinnar tegundar á Íslandi og niðurstöður rannsóknarinnar geta nýst sem grunnur að frekari rannsóknum og þróun fyrirbyggjandi aðgerða.