Nafn nemanda: Alfa Bæhrenz Björgvinsdóttir
Námsleið: Hagnýt atferlisgreining, MS
Leiðbeinendur: Magnús Blöndahl og Helgi S. Karlsson
Ágrip: Þessi rannsókn hefur það að markmiði að kanna áhrif tveggja útfærslna stafræns hvatningarkerfis, Beanfee Direct, á námsástundun og truflandi hegðun nemenda í almennum bekk á miðstigi grunnskóla. Annars vegar er bekkjarútfærsla kerfisins skoðuð og hins vegar notkun á bæði bekkjarútfærslu og einstaklingsútfærslu samtímis. Beanfee Direct byggir á hugmyndafræði hagnýtrar atferlisgreiningar þar sem áhersla er lögð á jákvæða styrkingu og skýrar væntingar á sjónrænan hátt. Notast var við einliðasnið með margföldu grunnskeiði yfir aðstæður til að meta orsakatengsl milli íhlutunar og breytinga í hegðun. Þátttakendur voru tveir nemendur í sama bekk sem sýndu báðir slaka námsástundun og truflandi hegðun í kennslustundum. Annar þátttakandi fékk bæði bekkjar- og einstaklingsútfærslu Beanfee Direct samtímis, en hinn þátttakandinn fékk einungis bekkjarútfærslu. Námsástundun og truflandi hegðun voru mæld í þremur mismunandi bóklegum kennslugreinum fyrir og eftir innleiðingu Beanfee Direct. Gerður var samanburður á breytingum á hegðun bæði innan hvers þátttakanda og á milli þátttakenda. Rannsóknin mat hvort innleiðing Beanfee Direct leiddi til aukinnar námsástundunar og minnkunar á truflandi hegðun, sem og hvort notkun á bekkjar- og einstaklingsútfærslu samtímis hefði meiri áhrif en bekkjarútfærsla ein og sér. Einnig var skoðað hvort breytingar í hegðun kæmu fram samhliða innleiðingu kerfisins í mismunandi aðstæðum, sem styður við mat á orsakatengslum. Niðurstöður bentu til þess að námsástundun beggja þátttakenda var breytileg á grunnskeiði, en jókst að meðaltali í sumum námsgreinum eftir innleiðingu Beanfee Direct. Hjá öðrum þátttakandanum komu fram skýrari vísbendingar um aukna námsástundun og minni breytileika, sérstaklega í íslensku, en hjá hinum þátttakandanum voru breytingar óstöðugri og mismunandi eftir námsgreinum. Truflandi hegðun minnkaði að meðaltali í sumum aðstæðum hjá báðum þátttakendum, einkum í íslensku og stærðfræði, en niðurstöður voru breytilegar og ekki samræmdar milli allra námsgreina. Í heild benda niðurstöður til þess að Beanfee Direct geti haft jákvæð áhrif á námsástundun og truflandi hegðun í sumum aðstæðum, en áhrif íhlutunar voru breytileg milli þátttakenda og námsgreina. Ekki komu fram skýrar vísbendingar um að samhliða notkun bekkjar- og einstaklingsútfærslu hefði meiri áhrif en bekkjarútfærsla ein og sér. Túlkun niðurstaðna er þó takmörkuð af þáttum eins og breytileika í gögnum, fáum mælingum í sumum aðstæðum og smiti milli fasa. Niðurstöðurnar gefa þó til kynna vísbendingar um notagildi Beanfee Direct og undirstrika þörf fyrir frekari rannsóknir.