Nafn nemanda: Hildur Edda Grétarsdóttir
Námsleið: Menntastefnur og matsfræði, M.Ed
Heiti verkefnis: Frá stefnu til framkvæmdar: Upplifun kennara af hlutverki skólaþjónustu sveitarfélags í daglegu skólastarfi
Leiðbeinendur: Eva Harðardóttir og Sverrir Óskarsson

Ágrip/efni (drög): Árangursríkt skólastarf byggir á góðri kennslu, námi og vellíðan nemenda. Til þess þarf samstarf og samvinnu margra aðila, þar á meðal kennara, skólastjórnenda, foreldra, skólaþjónustu og annarra fagaðila sem koma að námi og velferð barna. Á síðustu árum hafa auknar áherslur um inngildingu, snemmtækan stuðning og samþættingu þjónustu aukið væntingar til þessa samstarfs og hlutverks þeirra stuðningskerfa sem styðja við skólastarf. Samhliða hafa kröfur til skóla aukist um að mæta fjölbreyttum þörfum nemenda innan almenns skólastarfs. Þrátt fyrir þessar áherslur liggur síður fyrir hvernig kennarar upplifa þetta samstarf í framkvæmd, hvernig stefnumótandi markmið birtast í skólastarfi og hvernig stuðningur birtist þeim við dagleg störf og kennslu. Áhrif opinberra hugmynda um stuðning, fagmennsku og samstarf birtast með margvíslegum hætti í samskiptum kennara og skólaþjónustu. Tilgangur rannsóknarinnar er að varpa ljósi á hvernig kennarar upplifa og skilja hlutverk skólaþjónustu í daglegu skólastarfi og hvernig hugmyndir um stuðning, faglega ráðgjöf, samstarf og kennslufræðilega forystu birtast í samskiptum þeirra við þjónustuna. Sérstök áhersla er lögð á að skoða hvernig skólaþjónusta styður faglegt starf kennara og þróun skólastarfs í samræmi við stefnumótandi áherslur stjórnvalda um inngildingu, snemmtækan stuðning og farsæld barna. Rannsóknin byggir á eigindlegri rannsóknaraðferð. Gagna var aflað með hálfopnum einstaklingsviðtölum við átta kennara á grunnskólastigi. Viðtöl voru greind með þemagreiningu í anda Braun og Clarke. Niðurstöður rannsóknarinnar benda til þess að kennarar líti á skólaþjónustu sem mikilvægan samstarfsaðila en upplifi jafnframt að stuðningur hennar nægi ekki alltaf til að mæta fjölbreyttum þörfum nemenda í daglegu skólastarfi. Þá benda niðurstöðurnar einnig til þess að hlutverk skólaþjónustunnar sé ekki nægjanlega skýrt, sem skapar áskoranir í samstarfi, væntingum og framkvæmd stuðnings. Kennarar lýstu jafnframt togstreitu milli stefnumótandi áherslna um inngildingu, snemmtækan stuðning og farsæld annars vegar og þeirra úrræða sem standa til boða í framkvæmd hins vegar. Þeir lögðu áherslu á að þrátt fyrir metnaðarfull markmið skorti oft þær bjargir og þann beina stuðning sem nauðsynlegur væri til að mæta fjölbreyttum þörfum nemenda í framkvæmd. Rannsóknin varpar þannig ljósi á samspil skóla og skólaþjónustu og getur nýst við áframhaldandi þróun skólaþjónustu og stefnumótunar á sviði menntunar og þjónustu við börn, meðal annars með markvissari stuðningi við kennara sem stuðlað getur að auknum gæðum skólastarfs.